BITARTEKARITZA PROGRAMAK
LEZOKO 1go ANTZERKI TESTU LABURREN LEHIAKETAren testu garailearen PODKAST-a
Euskaltzaindiak Euskara Batuaren azken araua onartuko du gaur eguerdian. Euskaltzainburuaren idazkaria, Miren Gotzone, osoko bilkurarako azken gauzak prestatzen ari dela, bere iloba kuttun Aingeru Mirenaren deia jaso du; kontu garrantzitsuren bat esan behar omen dio, eta Lezotik Bilbora etorri zaio.
Bilkura hasi baino ordu erdi lehenago jarri dute hitzordua Euskaltzaindiaren egoitzaren ondoko kafetegian. Ilobaren mutil-lagunak, berriz ere, ez du EGA azterketa gainditzea lortu; Aingeru Mirena prest dago injustizia horrekin kosta ahala kosta amaitzeko, eta Miren Gotzone izeba behartu du Euskara Batua errazteko arau xelebreak eramatera Euskaltzaindiaren Osoko Bilkurara.
Fitxa teknikoa:
Testu egilea: Xabi Paya
Zuzendaria: Agurtzane Intxaurraga
Aktoreak: Miren Gojenola, Koldo Olabarri, Mikel Laskurain, Agurtzane Intxaurraga eta Haritz Lete
Musika: Audio Network eta Soundridemusic
Soinu diseinua eta nahasketa: Haritz Lete
Grabaketa estudioa: Lera estudioa
Irudia: Santos Bregaña
Ekoizpena eta koordinazioa: HIKA Teatroa
Podcastaren oinarrizko testua, Lezoko 1. Antzerki Testu Laburren Lehiaketan irabazlea izan da. HIKA teatroak EITB Podkast atarirako espresuki ekoitzi du podcast modura.
XABIER PAYA, ANTZERKI TESTU LABURREN PARTIDAREN URREZKO TXAPELDUNA (2023)
Antzerki festa bikaina ospatu zen larunbatean herrian
Antzerkia izan da Lezon protagonista asteburuan. Larunbat arratsalde-gauean, Herri Eskolako patioa bete egin zen Lezoko 1.go Antzerki Testu Laburren Lehiaketaren finalisten arteko partida ikusteko. 300 pertsona inguru bertaratu ziren 6 finalisten lanekin gozatzeko helburuarekin.
Lehen aldia zen Euskal Herri mailan era honetako deialdia egiten zena, eta “esperimentua” bikaina izan zen. Familia eta kuadrilla ugari bertaratu ziren eta publikoaren artean gazteek izan zuten protagonismo handiena. Lehiaketa honek,antzerkiaren artea ikusarazi eta gazteengana iristeko helburu zuela gogorarazi nahi da, besteak beste.
Ekitaldian Mikel Arruti (Lezoko alkatea), Aitzol Saizar eta Jon Legorburu (Kultura zinegotziak), Aitziber Atorrasagasti (Eusko Jaurlaritzako Kultura Sustatzeko zuzendaria) eta Agurtzane Intxaurraga (Hika Teatroaren zuzendaria) izan ziren.
DJ Bravaren musikarekin hasi zen antzerki festa. Ondoren, era desberdinetako antzezlanekin gozatu zuen publikoak. Ariketaren baldintzetako bat, antzerki testuetan ‘Lezo’ hitza azaltzea zen. Lehendabiziko 3 antzezlanen ondoren, ogitartekoa jateko aukera izan zuten ikusleek. Jarraian, beste hiru lan antzeztu zirelarik.
Hiru zuzendarien (Ander Lipus, Maika Etxekopar eta Olatz Beobide) eta 6 aktoreen (Eneritz Artetxe, Maryse Urruti, Koldo Olabarri, Idoia Tapia, Kimetz Etxabe eta Raquel Salinas) lana bikaina izan zen, publikoak izugarri gozatu zuen haiek erakutsi zuten profesionaltasunarekin. Irakurketa dramatizatuak zinez bikainak izan ziren, erregistro eta kolore handiko pertsonaiak antzeztuz.
Idoia Hernandez “Hatxe” musikaria arduratu zen testuinguru musikala sortzen, testu bakoitzaren irakurketarentzako musika inprobisatuz. Eta azkenik, Miren Gaztañaga eta Xanti Agirrezabala aktoreak aritu ziren aurkezle lanetan ekitaldiari erritmoa eta distira eskainiz.
Gailurra 23:30ak aldera iritsi zen, aktoreen lekukoa ikusleek jaso zutenean. Beraiek erabaki zuten bozkaz zein izango zen txapelduna. Orritxo batean, konfidentzialtasun osoarekin, gustukoen zuten lana hautatu zuten. 6 testuek jaso zituzten bozkak , baina Xabier Payaren lana izan zen bozkatuena, adostasun handiarekin gainera. Partaide guztiek txanpain botila bana jaso zuten eta txapeldunak 1.000 euroko saria jaso zuen Mikel Arrutiren eskutik.
Irabazlea pozik azaldu zen esperientzia eta sariarekin: “hasieratik oso koktel erakargarriaren itxura izan du Lezoko Antzerki Testu Lehiaketak: sortzeko aukera, taularatzea, inprobisazioa, zozketa, lehia, musika, Euskal Herriko zuzendari eta antzezle ezagunak, eta publikoa epaile, besteak beste. Bertaratutako guztiok izan genuen zerbait berriaren parte izatearen zaporea, eta niretzat saria irabaztea koktel gaineko ginda goxoa izan da gainera!”.
6 testu finalistak udaleko eta Hika teatroaren webgunean argitaratuko dira. Lehendabizi Xabier Payarena eta hurrengoak alfabetikoki; astero bat.
Lortutako arrakastaren ondoren, Lezoko Udala eta Hika Teatro konpainia, bigarren edizioa antolatzen hasi dira dagoeneko.
Egileak eta antzerki testuen izenburuak:
- ”Erga Tibo Pum” – Paya, Xabi – Irabazlea
- ”Beharrez Egin Dut”- Alvarez, Hegoa
- “Amaren Arropa Zuria”- Cid, Iñaki
- ”Ukondoa”- Guillan, Oier
- “Intxaurrak”- Marizkurrena, Ainhoa
- “1.13”- Urkola, Garazi
“TXALOSTEAN” LEZON (2022)
Lezoko Udaleko Kultura Sailak “TXALOSTEAN” proiektua jarri du martxan, Hika Teatroarekin elkarlanean.
Publikoak sentsibilizatzeko proiektu hau azaroaren 12an hasi zen Kultura Proiektuaren “Conquistadores” ikuskizunarekin.
Jarduera, Hika Teatroaren Zuzendaria den Agurtzane Intxaurragak dinamizatu zuen. Emanaldiaren ondoren, Agurtzanek hariari tira egiten lagundu zuen, eztabaida gidatuz eta publikoaren galderak bideratuz, lan-prozesua, zalantzak eta kezkak partekatzeko asmoarekin.
“Txalostean” egitasmoa luzaroan gelditzeko jaio da.
DRAMATURGIA ETA LAN-PROZESUAK KALEKO ARTEETAN (2022)
Urriaren 8an Artekalek antolatutako formazio ikastaroa egin zen Errenteriako Lekuona Fabrikan.
60 euskal konpainia inguruk kaleko sorkuntzak dituzte diziplina ezberdinetan, baina nolakoak dira haien sorkuntza-prozesuak? Zer hartzen duzue kontuan proiektu berri bati aurre egitean? Nondik hasten zara hariari tiraka?
Mahai-inguruak horretaz hitz egin zuen, sorkuntza-prozesuak bateratzeaz, partekatzeaz eta elkarrengandik ikasteaz.
Izotza apurtzeko, hainbat diziplinatako 4 konpainiarekin hasi genuen elkarrizketa: Cía Barré, Trakamatraka, Barsanti eta Amaia Elizaran. Gurekin izan zen PIA, espazio publikoko esku-hartze artistikoko proiektuetan espezializatutako portugaldar konpainia.
Hika Teatroako Agurtzane Intxaurragak hariari tira egiten lagundu zigun, eztabaida gidatzen eta gure prozesu, zalantza eta asmamen guztien artean partekatzen.
OLITEKO ANTZERKI JAIALDIA: LA TARARA (2022)
Oliteko Antzerki Jaialdia
LA TARARAren topaketa Josi Alvarado, Sandra Ferrús eta Agurtzane Intxaurragarekin.
#RecargaCultura #CulturaSegura #teatrolite2022
Kazetariek eta profesionalek “Emakumeak eta eszena” gaiari heldu zioten.
Oraingo honetan, Machús Osinagari (RTVEko kazetaria eta arte eszenikoetan aditua) eta Daniel Galindori (La Sala, RNE programaren zuzendaria), Raúl Losánez gehitu zitzaien (antzerki kritikaria La Razón egunkarian).
Hirurek hitz egin zuten Agurtzane Intxaurragarekin, Hika Teatroako La Tarara ikuskizunaren zuzendariarekin, Josi Alvaradorekin, La Tararako testuaren egilearekin, eta Sandrá Ferrusekin, La Tararako aktore eta Centro Dramático Nacional, Açafrão Producciones, El Silencio Teatro eta Iria Produccioneseko La Panaderaren egile eta zuzendariarekin.
Topaketan, hiru sortzaileak beren ibilbidean izan dituzten zailtasunez hitz egin ahal izan zuten. Beren kezkak, lorpenak eta etorkizuneko proiektuak partekatu zituzten, solasaldian aktiboki parte hartu zuten eta ondoren La CAVAN eskaintzen zen La Tarara ikuskizuna ikustera joan ziren gerturatutako publiko zoragarriarekin batera.
FORUM ANTZERKIA: LA TARARA OSTEAN. Haurren aurkako sexu-abusuei buruzko hausnarketa soziala. (2022)
Antzezlaneko ikuslegoa, haurren sexu-indarkeriaren eta horrek adingabeengan eta haien inguruan dituen ondorioen inguruan, sentsibilizatzeko eta kontzientziatzeko ekintza. Interesa duten herritar guztiei zuzenduta dago, eta, bereziki, obra ikusi dutenei..
“Sute bat, errautsak eta ahanztura”
Maiatzaren 12an eta 13an Donostiako Victoria Eugenia Antzokian TARARA eta LA TARARA antzezlanen ondoren, joan den maiatzaren 18an haurtzaroko sexu-indarkeriari buruzko antzerki foruma egin zen hiriko Okendo kultur etxean. HIKA Teatroa konpainiak berak, SORTZEN aholkularitza-enpresak eta Donostiako Udaleko Berdintasun Zerbitzuak antolatutako jarduera.
Sheila Melconek eta Norma Vazquezek, indarkeria matxistan adituak, Sandra Ferrús antzezlaneko aktore protagonista eta Agurtzane Intxaurraga zuzendaria elkarrizketatu zituzten Gipuzkoako hiriburuko Okendo kultur etxean egindako ekitaldian.
ZAPATAK
URRATZEN (2021)
2020an Astigarragan estreinatu genituen zapatak higatzen hasi gara. Orduko helburu berak lortu nahi ditugu: arte eszenikoak bultzatzea, publiko berriak sortzea eta daudenak fidelizatzea.
Proiektuak hainbat alderdi izango ditu. Lehenengoa abian da:
Paretik gabe
Hilero, Erriberako eszenatokira igoko gara, laugarren pareta hausteko eta artisten eta publikoaren arteko elkarrizketa bultzatzeko. Kasu guztietan, ikuskizuna hasi baino lehen, artistak eta haien obra aurkeztuko ditugu, eta, amaitutakoan, elkarrizketarako ateak zabalduko ditugu. Publikoak pertsonaiaren atzean dagoen pertsona ezagutuko du.
Astigarragak Arte Eszenikoetako profesionalak eta haien lana sakon ezagutzeko aukera izango du: nor diren, nondik datozen, talde artistikoaren filosofia zein den, ikuskizuna sortzeko abiapuntua zein den, erreferentea zein den…
ZAPATA
BERRIAK (2020)
ERRIBERA (2020ko irailaren 12a) Astigarragako kultur ekipamendu berriaren inaugurazioaren inguruan publiko berriak eta aktiboak sortzeko diseinatutako proiektua.
- Kultura-ekipamenduaren inaugurazio-ekitaldia, tokiko 100 eragile baino gehiagoren parte-hartzearekin: banakakoak eta kolektiboak, profesionalak eta zaleak.
- Zapata Berriak. Astigarragaren eta Kulturaren arteko harremanari buruzko 50 pertsona ezagun baino gehiagori egindako elkarrizketak ardatz dituen ikus-entzunezko dokumentala. DOKUMENTALA IKUSI
- Instalazio artistikoa. Hainbat profiletako astigartarrek idatzitako eta/edo marraztutako 5.000 postalez osatua. Herriko soinu-mapa barne hartzen du
TONBOLA
(biran)
Ikuskizun honek etorkinak eta baztertutako kolektiboak ekarri nahi izan ditu zentrora. Horrelako pertsonengana hurbildu gara, eta haiekin lan egin dugu. Eta arte eszenikoaren laguntzarekin erakutsi dugu bere errealitatea.
Era berean, antzerkiak elkarrizketa ezartzeko eskaintzen dituen aukeren adibide da. Proiektua gai izan da zaletasuna sortzeko, publiko berriak erakartzeko eta ohikoak fidelizatzeko.
TXARRIBODA
(biran)
Gure lanak nola irudikatu, nola ezagutarazi, nola erakarri publikoa eta nola gozatu, egunero egiten ditugun galderak dira. Nola? Adibidez, publikoarekin bitartekaritza-lan bat eginez, sorkuntza-prozesua herri bateko komunitatearekin partekatzeko aukera eskainiz, hasieratik obraren estreinaldira arte. Komunitatearekin etengabeko feedback bat sortuz.
TXARRIBODAren sormen prozesua bost herritan egiten da: Hernanin, Azpeitian, Durangon, Errenterian eta Donostian, profil ezberdinetako pertsonak sorkuntzaren parte sentiaraziz.
Gainera, emanaldi bakoitzean, publikoak gonbidatuen zerrenda osatzen du. Eta, emanaldi bakoitzean, herriko artistak daude oturuntza girotzeko: bertsolariak, dantzariak, musikariak, jota dantzariak, abeslariak…
KUADERNO ZURIA (2016)
KUADERNO ZURIA liburuarekin komunitatea sortu genuen Hernanin.
Hasieratik, prozesua pertsona-komunitate txiki batekin partekatu genuen, eta elkarrekin egin genuen bidea, estreinaldira iritsi arte.
Elkar aberastuz, baina, batez ere, proiektua bera aberastuz eta informazio mailan proiekzio handiagoa emanez.
ARMAIRUKO
APALAK (2021)
(KULTURA ESKOLA ekimena. Gipuzkoako Foru Aldundia)
ARMAIRUKO APALAK, EABk (Euskal Aktoreen Batasuna) eta Gipuzkoako Foru Aldundiak, Bigarren Hezkuntzako eta institutuetan garatutako Sormenaren parte izan proiektuaren emaitza da.
Agurtzane Intxaurragak sortutako antzezlan honek 30 minutuko iraupena du eta ikastetxeetan birsortzeko pentsatuta dago. Talde artistikoa bost interprete profesionalek osatzen dute, eta testua Agurtzane Intxaurragak idatzi du, aktoreen inprobisazioetan eta ikasleen iritzietan oinarrituta. Iritzi horiek proiektuaren estreinaldian jaso ziren, 2018an.
Postureoak, marjinazioak, desberdin sentitzeak, koldarkeriak, neska-mutilen rolek, errebeldiak… hainbat gai biltzen ditu, baina guztien gainetik: KUADRILA. Nerabezaroan gainerako egitura guztien gainetik dagoen egitura.
Proiektua, Foru Aldundiaren Kultura Eskola ekimenaren parte da.
